Compostela vístese este verán coa sofisticación atemporal de Amaya Arzuaga, quen, logo de máis de vinte anos de éxitos no mundo da moda, segue a marabillar con coleccións que funden moda e arquitectura.

Nesta tempada, a deseñadora burgalesa triunfa con deseños tridimensionais, nos que curvas, superposicións e pregues están enchendo de maxia os paseos, os balcóns e os salón.

O amor polo patrón, polos tecidos nobres e polos xogos volumétricos, está na orixe do verán de Arzuaga, no que os tules, crepés, tecidos tecnolóxicos e reixas dan forma a unha colección moi traballada caracterizada por formas onduladas e femininas, que lle achegan un toque de sofisticación ao roupeiro.

As súas persoalísimas propostas convídannos a deixar voar o maxín e sérvennos de fonte de inspiración e escusa para poder facermos unha viaxe no tempo ata outros veráns e para asomármonos ás festas e fastos dunha Compostela en branco e negro.

Vestidas de Amaya Arzuaga, as portas do salón amarelo do Casino ou da sala de baile do Círculo Mercantil, abriríanselle de par en par ás Marías, que, sen un oco no carné de baile, danzarían, felices, toda a velada.

O branco e o negro son tendencia esta tempada e abren este número de Coralia, o número 3, no que a moda nos permite mirar cara atrás e cara adiante con emoción e ilusión.

Coa maxia arquitectónica de Amaya Arzuaga, chegou o verán a Compostela.