«Gustaríame compaxinar os meus estudos con algún traballo, ademais de preparar a solicitude para a Escola de Moda de París». Con apenas vinte anos, Isaac Castelo ten as ideas moi claras. Mais xa as tiña cando era ben cativo e soubo que o que seu era a moda, e que el sería deseñador. Vestindo a Sandra García (@ssandragaral) converteuse nun dos grandes protagonistas da voda de 2019, a de Pilar Rubio e Sergio Ramos. A mesma repercusión que lograron outras das súas propostas, entre as que destacan as creacións para a actriz Lucía Regueiro ou para a famosa influencer Dulceida.

2019 está sendo un grande ano para el e a súa marca Caasi Sera –o seu nome do revés – coa que xa está atraendo a atención dos medios especializados a nivel nacional. Alumno da Escola de Arte e Superior de Deseño Mestre Mateo, Issac soña con facer os seus soños realidade «nalgunha cidade cosmopolita rodeado de xente diversa», pero polo de agora está centrado en «rematar os estudos, e aprender e ser feliz eu e facer feliz a xente que me rodea». Seguiremos de preto os seus pasos.

Na súa Colombia natal debeu enfrontarse a moitos que poñían en dúbida a capacidade da muller para a tatuaxe, mais ela sempre tivo claro que isto era o seu e o tempo deulle toda a razón. En Bogotá, Susan aprendeu dos mellores e para cando en 2015 chegou a Galicia xa traía os seus soños gravados na pel. La Tatuajería foi a materialización do seu soño, un local aberto en 2017 na Coruña que nun tempo récord xa está considerado como un dos mellores de Galicia.

Até a súa nai vén de deixarse tatuar: «fíxoo, a pesar de non gustarlle nada, porque quería demostrarme o moito que me quere e apoia». A listaxe de espera e as redes sociais, con preto de sete mil seguidores, son a mellor proba do seu éxito, polo que non é de estrañar que Susan xa estea pensando en abrir un segundo establecemento en Galicia, manténdose fiel á idea que sempre guiou a súa vida: «Convérteste no que pensas, atraes o que sentes e creas o que imaxinas».

Cada ano que pasa Leal faise máis imprescindible. Fai grande a nosa escena dirixindo e interpretando, e faina grande descubrindo talentos: non en van, cumpre trinta dirixindo a Aula de teatro do Colexio Peleteiro (en Santiago). Tiña só 15 cando fixo o seu debut no Teatro Estrada (de Tandil, Arxentina) coa peza A princesa das flores e desde aquela segue a crer que «na vida hai que estar alerta, cos ollos abertos, sen prexuízos, e manter sempre a mesma ilusión». Elisa y Marcela de Isabel Coixet e El Santa Isabel de Paula Cons son os seus dous últimos traballos para a gran pantalla. En televisión forma parte do elenco das series Lobos e Cordeiros da TVG e Vivir sin permiso de Mediaset.

E, ademais disto, enche teatros con Gloria Rico e Unha rosa entre as pernas e con Margarita, estreada no ciclo Teatro Obs-Ceno do Centro Dramático Galego. «Eu só quero seguir traballando!» confésanos nun descanso dos ensaios do seu novo proxecto: O mozo do último banco «un magnífico texto do gran Juan Mayorg. Un personaxe soñado e uns compañeiros de luxo, dirixidos por Álex Sampayo. Un agasallazo da Cía. Redrum». Para o arxentino-galego Leal, o outono vén, sen dúbida, cheo de aplausos.

A súa é unha vida libre de convencións e de plans a longo prazo. Vinculada a Médicos Sen Fronteiras desde 2012, ONG da que foi rostro na campaña publicitaria de 2017 #Yomequedo, esta enfermeira pediátrica teense leva percorrido medio mundo lidando coa desnutrición e as máis delicadas doenzas infantís: Níxer, India, Colombia, Guinea Bissau, O Iemen ou a República Centroafricana son algúns dos países onde coñeceu de primeira man a vida dos nenos e nenas máis fráxiles do planeta.

Precisamente agora, Ruth atópase en Venezuela poñendo en marcha un importante proxecto asistencial e non será até decembro cando toque «volver á casiña, traballar aquí unha tempada e poder gozar dos colegas e da familia»; daquela poderá tamén reencontrarse coa súa outra gran paixón: a música. «Nos últimos doce meses a faceta de disk-jokey fóiseme completamente das mans, dándome a oportunidade de pinchar nos meus garitos favoritos e botar a andar o proxecto La Fiesta Madre, con Sandra Camalea». O seu público agárdaa para volver gozar das súas sesións bootleg, nas que unha explosión de rap, funk, soul e house fai posibles fermosas noites sen fin.

Iago Crespo, Julián De la Torre, Manuele Pardo, Miguel do Pazo, Marcos Botana, Mario Sousa, José Codesido, Fernando Saavedra, Fabián Galbán, Manuel Pereira e Alberto Santos son Os da Porfía, unha sorprendente e orixinal agrupación xurdida en 2016 por amor á nosa música, aos nosos cantos e á nosa festa. «Dun xeito estrito -explica Mario- estariamos fóra do tradi, pero cos pés ata a zoca dentro, porque de aí bebemos. E, aínda que todas as ocasións son especiais, foi o espectáculo Herdanzas o que supuxo un antes e un despois: « Ser quen de xuntarmos máis de oitenta informantes na Praza da Quintana, que é a nosa casa, e a máis amigos, foi algo moi especial.

Sermos tamén un dos grupos escollidos para representar ao noso país no ano de Galiza no Festival Intercéltico de Lorient tamén foi algo importante». Os seus plans pasan por seguir traballando como até agora «facendo o que nos gusta, e buscando asuntos divertidos que vaian xurdindo». Bos amigos que gozan facendo o que fan, que poden afirmar que «o que veña virá e ha de ser bo».